هنيالك يا فيليبو

فى البوست اللى قبل ده وش طبعا حكيتلكم حكاية فيليبو اللى عنده 9 سنين وراح يشجع فريقه (( انتر ميلان )) وقالهم اكسبوا احسن صحابى هيضايقونى فى المدرسة ويغيظونى

بس الحقيقة انهم خسروا وتانى يوم واحد من مشجعين فريق اليوفنتوس كتب يافطة يرد بيها على فيليبو وقاله يا تغير مدرستم يا تغير ناديك من باب حرق الدم للواد الصغير يعنى

كتبت انا ان ازاى طفل عنده 9 سنين عنده ثقافة الاعتراض وانه بيفكر ازاى يوصل فكرته فى الوقت اللى اطفالنا هنا عندهم ثقافات تانية تتمثل فى الشتيمة وقلة الادب

الطفل فيليبو الايطالى اللى عنده 9 سنين كتب يافطة قال فيها اللى جواه واعتراضه على اداء الفريق , منتهى الوعى ومنتهى الديمرقراطية فى التعبير

فى حين ان مصر هنا فيها رجالة بشنبات وستات بشنط بيلت ان ومع ذلك فضلوا 30 سنة مش عارفين يقولوا لواحد بيموت شعبه وبيظلمه يوميا اى حاجة

ان شالله اى حاجة فى رغيف ولا كوباية ويوم ما خدوا حريتهم رفضوا واستكانوا وفضلوا يرجعوا للعبودية تانى وللذل تانى ويتهموا كل واحد طلب حريته وحقه فى التعبير انه خاين وبيخربها

المهم مش موضوعنا بلا سياسة بلا قرف مش ناقص انا حد يقولى انت حركة كفاية ولا 6 ابريل او يقولى انت مخرب ويتهمنى انى ممول او عميل طبعا احنا شعب الاتهامات فى بؤه زى لبان سمارة وقذف المحصنات عادى جدا المهم احنا موضوعنا هنا اهم جدا من مصر واللى بيحصل فيها موضعنا هنا عن الواد فيليبو

بعد ما كتبت البوست امبارح صحيت الصبح على خبر عجبنى جدا وكان جامد جدا

------------------------------------------------------------------

الخبر

حصل مشجع الإنتر الذي يبلغ من العمر تسع سنوات فيليبو على فرصة لزيارة مركز بينيتينا التدريبي للإنتر للقاء نجوم الفريق الذي عانى من هزائم متكررة مخيبة للآمال خلال الأسابيع.

فيليبو كان قد رفع في بداية مباراة الإنتر ضد بولونيا في السان سيرو لافتة كُتِبَ عليها "ألا نستطيع الفوز اليوم؟ و إلا سيسخرون مني في المدرسة! شكرًا لكم، فيليبُّو"، إلا أن الأفاعي أحرجوه بهزيمة بثلاثية نظيفة على يد رفاق ماركو دي فايو.

و بعد أن أثارت تلك اللقطة دويًا كبيرًا في جنبات كرة القدم الإيطالية و تسببت في سخرية مشجعي الميلان و اليوفنتوس منها، قام رئيس الإنتر ماسمو موراتِّي شخصيًا بدعوة الصبي اليافع و عائلته إلى مركزه التدريبي.

و قد نظم موراتِّي لفيليبُّو و عائلته جولة خاصة داخل المركز التدريبي، فيما قام خافيير زانيتِّي بإهدائه قميصه الخاص بتوقيعه، و قد قال فيليبُّو لقناة تيلي لومبارديا "لن أغير الفريق، سأبقى مشجعًا للإنتر".

كانت تلك العبارة ردًا على لافتة مشجعي اليوفنتوس التي سخروا فيها من فيليبو قائلين "إما أن تغير مدرستك، أو تغير ناديك"، قبل أن يتابع الطفل قائلا "حين فزنا بالثلاثية كنت أنا من سخر من أصدقائي".

"الآن يمكنني الذهاب إلى أي مكان برأس مرفوعة. آمل أن تكون اللافتة التي رفعتها ضد بولونيا هي آخر واحدة أضطر لرفعها.."

------------------------------------------------------------

هو ده الخبر , منتهى الاحترام والله مع انهم السبب فى ان العيال بتغيظو عرفوا غلطهم و حاولوا يصلحوه باى طريقة

عزموا الواد على فسحة جوه النادى وبالاخص جوه اماكن التدريب وطبعا دى مش سهلة انك تنزل ارض ملعب النيراتزورى (( الانتر ))

الواد كان عنده تسامح وقال طب منا من سنتين كنت كسبان دورى ايطاليا والكاس ودورى ابطال اوروبا وانا اللى كنت بغيظ صحابى

عادى يعنى يوم ليك ويوم عليك

وهفضل اشجع الانتر طول حياتى

هنا فى مصر بقى ولا عندنا ثقافة الاعتذار ولا حتى ثقافة التسامح

هتكلم عن نفسى كزملكاوى شجع الزمالك من وهو عنده 5 سنين فى وسط عائلة كلها اهلاوية حتى النخاع او حتى الثمالة زى ما بيقولوا

من 2002 من ساعة ما خدنا بطولة افريقيا ما شميناش غير كاس مصر وكانت بطولة صدفة كده

ومع ذلك كان التراس الزمالك فى الملعب كل ماتش بيشجع لحد ما زوره بيوجعه وصوته بيروح

التعبير عندنا اما حد بيتضايق مبيبقاش بيافطة

لا

بيبقى بوابل من السباب ولعن سلسفيل الاهل من جدود الجدود

سواء طفل صغير او راجل كبير

وجمهور الاهلى يشتم جمهور الزمالك والزمالك يشتم الاهلى

وده يشتم عماد متعب وده يشتم شيكابالا

وقلة الادب بقت متوفرة بالاسواق بكثرة

كل ما اتمناه ان ادارة الزمالك تعترف باخطائها الادارية ومتقيلش مدرب او تغير مدرب

لا انا نفسى يعترفوا ويقولوا احنا مقصرين

ونفسى برضه اللاعيبة تحس على دمها شوية وتسترجل الفلوس اللى بياخدوها يحللوها

اما احنا بقى فنا بجد مش عارف اقول ايه

اصل احنا ضحايا والله

شباب زى الورد عندهم وفاء لا حدود له

بس دايما بتخذلونا

اوقات بيبقى معايا 20 جنيه والماتش بكره وباجى على نفسى واروح الماتش عشان بحب اشوف الزمالك فى ارض الملعب وافضل اشجع فيهم

ليه بجد بتتكيفوا اما بتخذلونا وتحرقوا دمنا

عموما ادينا صابرين

وعموما هنيالك ياعم فيليبو على فانلة زانيتى الاصلية وانك تنزل ارض الملعب حتة واحدة

واحنا ربنا ياخدنا ويريح النادى مننا احسن احنا جمهور رخم