كفاية تناقض بقى

كرهت القهوة , أيوه كرهت القهوة , القهوة قبل الثورة كانت مكان لتقضية الوقت اللى مش لاقيين أى حاجة نقضيه فيها , القهوة كانت مكان للعواطلية اللى مش لاقيين شغل عشان يقضوا عليه وقتهم يلعبوا دومنة , أو للشباب الشغالين اللى اصلا شغالين بس مش شغالين وطالع عين اللى جابوهم ولا عارفين يدخلوا سينما ولا يروحوا نادى لانه بكل بساطة مرتبه ميساعدش انه يعمل انشطة تانية غير انه يلعب دومنة او طاولة , القهوة زمان كانت مكان للشباب يتكلموا فيه عن اى حاجة ما عدا السياسة ولو اتكلموا فى السياسة بيبقى بصوت واطى .


القهوة مكان اجتماعى بيضم كل الاعمار وكل فئات المجتمع , عالقهوة بتلاقى شباب زى ما قلنا شباب متعلم وشباب مش متعلم صنايعية وعواطلية ومنحرفين , عالقهوة بتلاقى رجالة كبيرة برضه صنايعية او موظفين حكومة , مبيجمعهمش شغل او مصلحة لكن بتجمعهم القهوة , جوه القهوة لا فرق بين أحد , فى الاول كان كل الناس مجتمعين على رأى واحد الا وهو ان البلد دى كلها فساد وان حسنى ده ابن ستين فى سبعين وان النظام ده هو السبب فى كل حاجة وحشة , مكنش حد بيختلف على ده .


بعد الثورة القهوة أصبحت مكان عشان اقابل فيه صحابى اللى انقسموا الى ثورجية او ناس بتسب 30 دين للثورة , بدات اشعر بالتناقض مع الناس دى بجد وحصلت مناقشات كتير وكانت بتوصل لحد الخناق طبعا مش بالايد لكن كان الخناق كلام وصوت عالى واتهامات , ناس تتهم الثورة بانها بتولع البلد وناس تتهم الناس التانيين بانهم معندهمش دم وهكذا اصبحت القهوة مكان لحرق الدم .


من سنة بالظبط صحابى كانوا ضد النظام قلبا وقالبا , النهارده بقوا يشتموا الثورة اللى يمكن خلتهم يتكلموا بصوت عالى من غير خوف , لكن اتضحلى حاجة , فيه ناس الاكل والشرب بالنسبالهم اهم من حاجات كتير , اهم من الحرية واهم من المبادىء واهم من كل الهرى اللى بالنسبالهم ملوش اى 30 لازمة .


لحد النهارده من سنة كاملة بالظبط مبسمعش غير كلمة واحد (( عاوزين نستقر بقى وناكل عيش )) , كنت اتمنى ان اللى يقولى كده شخص منتج عنده مصنع عنده ورشة ان شاء الله يكون ايه المهم بينتج حاجة من صنع ايده , لكن 99% من كل الناس اللى كلمتنى عبارة عن تجار مستوردين بيجيبوا بضاعة صينى ويبيعوها للناس , وسواء عالقهوة او فى اى حتة تانية مكلمنيش واحد بينتج حاجة من عمل ايده كل الناس اللى بتتكلم تجار ومبيبيعوش صناعة محلية لا كلهم منتجات صينى وكورى وماليزى وتايوانى .


مع آخر دعوات الاضراب والعصيان المدنى الناس انقسمت الى مؤيدين ومعارضين , طبعا المؤيدين خلصنا منهم ومن اهدافهم عاوزين ايه , عشان قصة عاوزين ايه دى انا مش هقضى حياتى كلها احكيها , اللى عاوزينه هو اللى الثورة (( التى لم تكتمل )) كانت بتنادى بيه , الطرف المعارض بقى هقولكم هما مين

• القهوجى اللى لما سمعنا بنتكلم دخل فى الموضوع وقال اضراب مين دى ناس عاوزة تخرب البلد حرام يا جدعان بقى - من باب العلم بالشىء القهوجى دى عايش حياته بشريط البرشام (( ترامادول و تامول و اباتريل و باور )) ولو ملاقاش كل ده بيجيب ازازة دواء كحة ( توكسافين ) , من الاخر مدمن ومضيع فلوسه عالعَجَل و العجلة هى الاصطلاح المتعارف عليه الان للبرشام .
• صديقى اللى مش متعلم اللى عاش حياته كلها بيحاول ياخد الدبلوم ومعرفش برضه واتجه لانه يشتغل وطبعا كل ده مش عيب , لكن الراجل بالنسباله برضه ولا يعرف اى حاجة فى اى حاجة وزمان كان بيسب الدين للنظام والنهارده بيسب الدين للثورة وطبعا مدمن برضه بس ده على نزيه شوية , كل يوم سيجارتين حشيش .
• صديقى المتعلم اللى برضه ولا كان بيقرا ولا كان بيفكر يفهم اللى بيحصل فى البلد ودايما كان عارف الصح من الغلط بس هو بقى سلبى من كتر الكبت اللى فينا , وهو دلوقتى بيشتغل فى شركة مرتبه بيكفيه بطلوع الروح , ده بقى ملوش فى المخدرات لانه ممعاهوش يصرف عليها , بس هو كده كده بيحاول يعمل اى حاجة , انا مش بعيبه فى حاجة لكن انا متفهم موقفك انك مش هتضرب اوكى كلام جميل , لكن ليه تتهم اللى بيضربوا انهم عاوزينها خربانة , ما يمكن انت اللى بتصرفاتك دى بتخربها , ليه نحكم ونصدر احكام من غير فهم ومن غير معرفة .
• عم الحاج وده راجل كبير بييجى عالقهوة طلع معاش هو وعايش على المعاش سنه فوق الستين وولاده لاقيين بيت اتبنى ايام الرخص وايام ما كان متر الارض ب 1 جنيه , طبعا هو مش فارق معاه اى حاجة لانه الى حد ما مأمن نفسه , فالبتالى يولع التحرير ويولع الشعب المصرى أهم حاجة ان انا مرتاح , وعيال التحرير دول هما السبب فى الولعة , ده فى الانتخابات راح ادى صوته للوفد (( عايش على حس فؤاد سراج الدين الله يرحمه ميعرفش ان فيه سيد البدوى خاربها )) وادى صوته التانى للفلول (( عشان صاحب القهوة مرشح نفسه وهو ميعرفش غيره وعشان العيش والملح والكلام اللى زهئنا منه ده )) اما اتكلم عن الاضراب قال باللفظ " بلا وساخة وقلة أدب " عاوزين ايه تانى ثورة واتعملت وحسنى فى المستشفى ليه نخربها .
• صحاب محلات ملابس وادوات كهربائية والكلام ده , ودول اصلا متفهمش هما مع مين , يعنى فى عز مالناس كانت بتندهس فى الشارع عند ماسبيرو دول كانوا عالقهوة بيشيشوا وبيقولوا احسن خليهم يولعوا ويريحونا من القرف بتاع التحرير وماسبيروا والاعتصامات , واما كنا بنموت فى محمد محمود كانوا بيقولوا عاوزين يولعوا الداخلية ليه (( مع العلم محدش راح شاف ان الناس اصلا ولا جات جمب الداخلية بس بيقولك سمعنا )) ودول برضوا وكل الناس اللى ذكرتها وبذكرها قالوا عن فتاة التحرير (( هى لابسة عباية كباسين ليه وايه اللى وداها اصلا )) , دول مع اى حد بيمشى مصلحتهم مع بتوع الحى والحزب الوطنى وكانوا بيعلقوا اليوفط بتاعته واما الثورة جات بقوا يحطوا صور الحرية والعدالة , دول بقى رايهم فى الاضراب انه خراب بيوت لان البضاعة اللى جايبها حالها هيقف (( طبعا بضاعة صينى )) مافيش فتفوتة مصرى .
• الناس الغلابى الارزقية ودول اكتر ناس بتتفهم منك انت بتقول ايه ونفسهم البلد تتغير وعارفين ان الثورة حق لانها كلمة حق فى وش سلطان جائر ومساندينها بس دول مش هيضربوا لانه ببساطة مش هيلاقى ياكل ومع كده مشتمش فى الاعتصام ولا اتهم حد بالخيانة والخراب .

80% من اللى معارضين الاضراب معارضين لانهم فقدوا حاجات مهمة اوى كنا بنتميز بيها زمان عن اى حد , النخوة والكرامة وعدم المطاطية (( مطاطية هما يعنى طاطى مش الرصاص المطاطى ))عايشين عشان ياكلوا ويشربوا بس , على فكرة مش عيب ... العيب انى مسلمش من سلبيتك ومسلمش من لسانك كمان ومن تفكيرك وانك تحكم عليا انى بخرب .


ال 20% الباقيين هما الغلابى اللى مغلوبين على امرهم على فكرة مصر فيها اكتر من 50% غلابى بس ال 20% دول هما اللى بيقدروا يقعدوا عالقهوة ودول انا مش بعتب عليهم لانهم عيشتهم صعبة لكن مع كده الدنيا عندهم مش اكل وشرب , لانه جاع واتمرمط وعرف انه ممكن ينام من غير ما ياكل لكن عزة نفسه وكرامته تمنعه انه يتسول ويشحت , ده ميمنعش ان فيه ناس حالتهم وظروفهم اصعب بمراحل وبقى ادامهم خيارين يا يشحتوا يا ياكلوا من الزبالة وبرضه مش بعتب عليهم بالعكس انا قلبى يدمع وعينى تدمع لرؤية مصريين بهذا الشكل وهذا الوضع .


الشعب اللى معارض العصيان ده هو نفسه اللى من اسبوع او اقل شاف مجزرة بورسعيد وتعاطف معاها وفضل يشتم (( يشتم بس هو مبيعرفش يعمل اى خطوة ايجابية , تخصص شتيمة بس )) بعدها الشهداء اتنسوا وكل حاجة اتنست والدم بقى رخيص فيكى يا مصر ويقولك ايه اللى وداهم يشجعوا اصلا وياعم هياخدوا تعويضات , انا كروح ربنا كرمنى وفضلنى على بقية مخلوقاته انى اعمر الارض بقيت مجرد تعويض شيك بيتصرف من البنك ده اذا رضيوا يصرفوهولى اصلا .


اللى يغيظك من معارضين العصيان انهم كانوا بيزعلوا اوى لو يوم الاجازة الرسمية زى مولد النبى او 6 اكتوبر ييجى يوم جمعة او ان العيد ييجى خميس ويبقى الجمعة من ايام الاجازة , تعبت من التناقض والتفكير فى البلد اللى الصبح بترش مياه وتشغل قرآن والعصر تشغل شعبى ,, تعبت من الشعب اللى فيه واحد الصبح يروح الشغل ويصلى وبالليل يدور على اى حد يشرب معاه سجارتين ,, تعبت من الشعب اللى بيتفرج الصبح على محمد حسان وبالليل بيجيب ميلودى افلام عشان يتفرج على فيلم حين ميسرة, الشعب اللى الدش بتاعه عليه قناة الناس وبعدها علاطول قناة ميلودى والتت .


*ملحوظة : فيه ناس مش جايبه قناة التت ورا الناس او الرحمة عشان الانصاف هما جايبينهم فى آخر الدش وفيهم مش جايبهم برضه عشان الانصاف بس للانصاف اوى هما مش عارفين ترددها كام :D

كفايـــــــــــــــــــــــــــــــــــــــــــة تناقض بئى