Sunday, February 19, 2012

حكاية طفل ايطالى اسمه فيليبو

 
Potete Vincere? Altrimenti a scoula mi prendono in giro .. Grazie (( Filippo )) InterMilan tifoso

الواد بيشجع الانتر " كتب يافطة وهو فالماتش بيقول لفريق الانتر (( هتقدروا تكسبوا ولا هتخلوا العيال تغيظنى فى المدرسة .. شكرا .. فيليبو ))




Filippo, o cambi scoula, o cambi squadra (( Juve tifoso )) 


الانتر يوميها خسر 3 على ارضه ههههههههههه تانى يوم واليوفنتوس بيلعب واحد من جمهور اليوفى جاب يافطة مخصوص كاتب عليها (( فيليبو ,, يا تغير المدرسة يا تغير الفرقة ))

بعيدا عن نتائج الانتر اللى زى الزفت وبعيدا عن ان ماسيمو موراتى هو السبب الرئيسى اصلا ورا النتائج الخرة اللى بيحققها الانتر السنة اللى فاتت والسنة دى 
بس احب اقول ان اليافطة دى بتوضح اد ايه الطفل ده مبدع ولقى فكرة يعبر بيها عن حزنه من فرقته
عندنا الطفل المصرى مبدع وكل حاجة بس فى الاذى وقلة الادب والشتيمة وكل ما هو قليل الادب
بالرغم من ان الطفل المصرى طفل ذكى بطبيعته بس فيه عوامل كتير بتاثر فيه وبتاثر فى طريقة تفكيره
اولها طريقة تعامل اهله معاه 
السادية من احد الابوين او من الاتنين سوا اللى خلفوا عيالهم عشان ينتقموا منهم مش عشان يحبوهم ويفرحوهم
او طبعا الدلع الزائد عن حده اللى دايما بيقلب لضده
لو جابوا واد يبقى عندهم فرخة بكشك يشيلوه على الاعناق اكنه الناصر صلاح الدين 
وعادى جدا ممكن يشتم ويقول احا ويقول كمان يابن الوسخة لاى حد يضايقه وطبعا الاب دايما بيفشخ بؤه زى الاهبل فرحان بالتربية الحلوة ولو حد اشتكى يقول مانت اللى ضايقته يبقى استحمل فى الحالة دى انا اللى هقول احا مش ابنك
الام بقى يا اما بتضربه ضرب مبرح يخلى الطفل يعند اكتر يا اما اصلا هو بيشوفها بتقول الكلام ده والكلام ده مكتسب من ابوه وامه ومن البيئة اللى حواليه
نيجى بقى للمدرسة اللى بتعقد الطفل من اول يوم 
10 كشاكيل و 50 كراسة و مقلمة وشنطة وكتب يستلمها وواجب يحسسك ان الواد هيخلص اولى ابتدائى يطلع عالجامعة عدل
الطفل الاوروبى اللى ادامنا ده فضل 5 سنين ميتعلمش اى حاجة فى المدرسة غير الرسم والهوايات وطريقة التعامل مع اهله ومع الناس
الطفل اللى ادامنا ده صحته حلوة مشالش شنطة وزنها 20 كيلو وهو 25 كيلو بالكتير اوى
الطفل اللى ادامنا ده بيدولوا الوان ويقولولوا ارسم 
بيتدرب على عرض بيعمله اخر السنة شو صغير كده على ما قسم
لكن الطفل عندنا من اول بياخد واجب يعمله 70 مرة اكنه ذنب عليه
ليه يكتب مثلا كلمة آبل 90 مرة فى الكراسة طالما هو فهم معناها ايه وعرف الكلمة
ليه اذله حتى بعد ما يروح من المدرسة انى اديلوا واجب يضيع وقته فيه
هيلعب امتى وهيضحك امتى وهيقعد مع صحابه امتى
الطفل عندنا بقى مجرد فلاش ميمورى بيخزن بيخزن وبعدين يكبير اخر السنة
انا فاكر ايام الجامعة استاذ التاريخ الفرعونى كان مسافر المانيا لمدة 15 قضاها هناك
فى المحاضرة قالنا الطالب المصرى عامل زى اللى بيفضل ياكل اكل مش كويس وييجى يرجع (( يطرش = يتقيأ )) اللى كله فى ورقة الاجابة
آسف على القرف بس انا اصلا قرفان خلقة
حرام اللى بيحصل فى ولادنا ده
حرام الضرب
ليه من الاساس اديلوا العادة السيئة انه يشوفنى بشتم او بتخانق ولو قلدنى اضربه واكسر عضمه
ليه بجد
حرام العيال بتطلع شخصياتها مش سوية
ليه وزارة التربية والتعليم مبتعملش اختبار نفسى للمدرسين قبل ما تعينهم
بدل كل كام يوم ما بنسمع عن مدرس ضرب طفل وذله ادام صحابه
ماهو لو فضلنا نذل فيه هيكبر وهو ميعرفش طعم الكرامة ايه
حرام بجد 

1 Comment:

Anonymous said...

انستقرام شعر حبانستقرام شعر حبانستقرام قصايد حبانستقرام قصايد حبانستقرام شعر غزلانستقرام شعر غزلانستقرام شعر فراقانستقرام شعر فراقشعرشعرضحكضحكانستقرام شيلات
قصيدقصيد

Post a Comment